德甲踢完前四轮之后，边两支球队入波最多?相信唔少人都会「觉得」係拜仁慕尼黑同多蒙特，但事实入波最多竟然係今晚对撼嘅贺芬咸同慕逊加柏!呢两支娱乐性十足嘅球队今季大玩「有前冇后、打死罢就」，既然双方都摆到明要以狂攻嚟娱乐球迷，今场唔捧「入球大」仲点对得住自己呀?

　　(有线61、64、201及203周日晚9:30直播)

　　两队入波冠绝德甲

　　主场出击嘅贺芬咸头4场波入12球，锋力冠绝整个德甲，新星前锋禾兰嘅爆发绝对係主要原因，呢位7月先至21岁生日嘅前锋连续3场联赛都有波入，就连啱啱代表德国U21对捷克都梅开二度，挞着咗想勒都勒唔住啦!不过贺芬咸头4仗合共嘅失球同样係12球，同样係德甲失波最多球队，睇佢哋踢波点可能会少士哥?

　　贺芬咸够癫啫，最重要係作客嘅慕逊加柏都陪佢哋一齐癫，前四场联赛录得10个入波同8个失波，作客拜仁慕尼黑同利华古逊都够胆死主攻，结果佢哋如愿以偿场场入波，但就付出输1:3、2:4嘅惨烈代价，艾兰高、拉菲尔基达奴同麦斯古斯呢个「三叉戟」上仗齐齐有士哥，信心爆棚，肯定同贺芬咸死过。