马里奥高美斯着晒火

　　新球季以来首场意甲早场大战，由重现劲旅本色嘅费伦天拿，主场迎战卡利亚里。主队虽有射手基奥斯比罗斯上阵成疑，但单係一个德国「新轰炸机」马里奥高美斯，已经足以炸爆客军，特别係卡利亚里嘅豆腐防线两战已经失咗4球，今场费伦虽然要让一球，但一于博「紫百合」大胜，捧2.1倍「让球主胜」!

　　(开赛时间：周日晚上6:30)

　　费伦自从上季由「飞机仔」蒙迪拿接过帅印之后，表现的确重现生气，上季佢哋喺意甲以第4名过终点，仅仅错失欧联参赛资格。今个夏天佢哋继续积极增兵，其中签入马里奥高美斯最有睇头，加埋罗斯仔严重膝伤痊愈，火力即时跻身世界级，唔係讲笑，费伦开季2战就轰入7球，其中罗斯仔入3粒，高美斯就有2球进帐。

　　卡利亚里后防主将缺阵

　　虽然赛前有消息传出，罗斯仔或因伤缺阵，不过蒙迪拿已经证实，困扰住罗斯仔嘅唔係膝伤旧患，即係话伤势唔係严重，话唔定佢今仗先任后备，换边后先落场一样会有威胁。至于高美斯以往喺德甲有几劲都毋须多讲，再睇埋德国超级射手高路斯嚟到意甲入波易过执豆，高美斯肯定都会啱呢度嘅踢法。

　　更令力奇对佢哋充满信心，係原来费伦历来喺意甲主场25次斗卡利亚里，係录得21胜4和嘅不败佳绩，摆明食住对手。再者，卡利亚里今仗会有守将法兰斯高比辛奴缺阵，条防线上仗都顶唔住AC要失3球，今晚睇怕都係凶多吉少，拎定个箩嚟捧蛋啦!